Boynubükük lalə

Bir az önə əyili, bir az qəmgin,

Bir yetim Lalə bitmişdi yol qırağında.

Lalələrdən ayrı düşüb bura sən

Gəlib çıxmışdın kimin sorağına?

Bir yetim lalə bitmişdi yol qırağında,

Bir az gözdən iraq, bir az da tozlu.

Yorğun lalədə həvəs yoxdu daha,

Boynubükük idi, həm də ki yolçu.

Hardan gəlmişdin bura,

Hardan düşmüşdü toxumun

Bu izsiz yol kənarına?

Lalələrdən ayırıb,

Səni kim gətirmişdi bura?

Bəlkə taleyin oyunuydu bu,

Bəlkə də bitmək istədiyin yer varıydı?

Harda bitmək istəyirdin?

Bəlkə

Bir izsiz məzarın qoynuydu bu?

Bir yetim lalə bitmişdi yol kənarında...

Bu lalə,

Yetimlərin laləsiydi,

Ahıydı, naləsiydi

Yetimlərin...

Bir lalə bitmişdi yol kənarında...

Bir də ordan keçəndə mən

Çoxdan itmişdi lalə

Yol kənarından...